Nau mai ki Te Ipukarea
Whakatūria ai te tari rangahau a Te Ipukarea i te tau 2008, ā, ko Te Wānanga Aronui o Tāmaki-makau-rau tōna kāinga. Ko te uho rangahau o Te Ipukarea, ko te reo, te ahurea, me te mātauranga o te Māori.
Tērā tonu a Te Whare o Rongomaurikura, he tari whakarauora reo, e noho ana ki roto pū o Te Ipukarea. Ko tēnei whare tō mātou tumu whakapūmau ki te whakarauoratanga o ngā reo taketake me ngā reo mōrearea, ā, ko te reo Māori kei te aroākapa o tēnei kaupapa.
Te Ariā
E whā ngā pou rangahau e ārahi ana i a mātou mahi katoa:
Te Whare o Rongomaurikura - ko te pou reo tēnei e aro pū ana ki te mauhanga reo, te whakamahere reo, te whakarite kaupapa here reo, te whakaako me te ako o te reo, tae atu anō hoki ki te whakapūmautanga o te reo Māori ki roto o Aotearoa nei.
Taonga Tuku Iho - ko tēnei te pou o ō tātou kōrero tuku iho, mātauranga tuku iho, tae atu ki ngā toi me ngā tikanga tuku ā-waha.
Tino Rangatiratanga - he mea tango mai tēnei pou i ngā wāhanga o Te Tiriti o Waitangi e aro ana ki te mana motuhake o te Māori, ā, hui mai ki konei ngā rangahau e pā ana ki ngā mōtika, kāwanatanga, mātauranga, hauora, me ngā kaupapa here o ngā iwi taketake o te ao.
Te Moana Nui - ko te pou tēnei e tūhono atu ana ki ngā kaupapa rangahau o Te Moana-nui-a-Kiwa, ā, ka aro ki ngā kaupapa whakataurite, kaupapa iwi tūporoporo, kaupapa taiao, whakauka anō hoki.
Arahina ai mātou e te whakataukī 'whakatepea te kō', nō tāna whakaū i te tikanga mahitahi a tō mātou rangapū. Waihoki, he mea whiri ki ngā kaupapa rangahau e mātua hāngai ana ki ngā hiahia o ō tātou hapori. Tāpiri atu ki tēnei ko tō Te Ipukarea hiahia kia noho hei wāhi e pai ai te wānanga i ngā mahere, i ngā tirohanga taketake ki roto i ngā whare wānanga.
Te Whare o Rongomaurikura
Ko te moemoeā o Te Whare o Rongomaurikura, he āwhina i te whanaketanga o ngā tohunga whakarauora i ngā reo taketake, i ngā reo mōrearea mā ngā kaupapa rangahau rangatira me te tautoko i te tūhonotanga o ngā kairangahau ki ngā hapori reo. He rua ngārehu tēnei e taea ai e ngā kairangahau, e ngā tauira, e ngā mātanga o te ao whakarauora reo te kōrero tahi, te tohatoha wheako, te ako tahi me ētahi atu rōpū e whakapau kaha ana ki te whakaora i ō rātou reo.
